Минатата недела членовите од Фото клуб Куманово отпочнаа со реализација на работилница наменета за лицата со попреченост во просториите на ЗРЦЛИП „Порака Наша“. Со работилницата е предвидена социјална вклученост преку едукација, усовршување и промоција на уметничката фотографија. Имено лицата со попреченост ќе имаат можност да се запознаат и дружат со членовите од ФК Куманово, кои преку теориски асоцијации и практични игри ќе им овозможат осознавање за основите на фотографијата. Изработените фотографии направени од лицата со попреченост од „Порака Наша“ и оние од членовите на ФК Куманово ќе бидат дел од хуманитарна изложба на Малински фото фестивал во месец мај. Малински фото фестивал е единствен од ваков тип на Балканот и со хуманитарниот подвиг тој влегува во една нова димензија која само ќе го потврди и запечати реномето на настанот, брендот на Фестивалот и клубот.
Целта уште кога ја потпишавме соработката со претседателот на Здружението „Порака Наша“ ни беше да дадеме допринос како клуб, а и преку наше лично залагање во едукација и оспособување на лицата со попреченост. Да им дадеме можност да се искажат преку фотографијата, а и да дојдат до еден вид на занает.
